ຂ່າວລາຍວັນ

ແມ່ຍິງຖືພາຖືກປະຕິເສດການປິ່ນປົວ ສຸດທ້າຍລູກເສຍຊີວິດ

ໂຮງໝໍໃນຊີອານບໍ່ຍອມຮັບແມ່ຍິງຖືພາເຂົ້າປິ່ນປົວຈົນລູກເສຍຊີວິດ, ຫລ້າສຸດຫົວໜ້າພະແນກໃນໂຮງໝໍຖືກໄລ່ອອກແລ້ວ.

ວັນທີ 6 ມັງກອນ 2021, ສຳນັກຂ່າວບລູມເບິກ (Bloomberg) ລາຍງານວ່າ: ແມ່ຍິງຖືພາ 8 ເດືອນທີ່ອາໄສຢູ່ເມືອງຊີອານຂອງຈີນ ຖືກເຈົ້າໜ້າທີ່ຢູ່ໂຮງໝໍເກົາຊິນປະຕິເສດໃຫ້ການປິ່ນປົວເມື່ອວັນທີ 1 ມັງກອນຜ່ານມາ ເນື່ອງຈາກຜົນກວດໂຄວິດ-19 ຂອງນາງໝົດອາຍຸໄປແລ້ວເປັນເວລາ 4 ຊົ່ວໂມງ ຈົນສຸດທ້າຍລູກເສຍຊີວິດ.

ເລື່ອງນີ້ຖືກແຊຣ໌ໃນໂລກໂຊຊຽວມີເດຍ ໂດຍຜູ້ທີ່ລະບຸວ່າເປັນຫລານສາວຂອງແມ່ຍິງຖືພາ ພ້ອມກັບມີການເປີດເຜີຍວິດີໂອຂອງແມ່ຍິງຄົນດັ່ງກ່າວຂະນະເລືອດອອກເຕັມພື້ນໜ້າໂຮງໝໍ.

ປະກາດຂອງລັດຖະບານທ້ອງຖິ່ນເມືອງຊີອານເຜີຍວ່າ: ມີຫົວໜ້າພະແນກ 2 ຄົນຂອງໂຮງໝໍຖືກໄລ່ອອກຈາກເຫດການນີ້ ແລະ ມີຄຳສັ່ງພັກວຽກຜູ້ຈັດການທົ່ວໄປນຳອີກ ໂດຍຊີ້ວ່າເປັນອຸປະຕິເຫດທີ່ເກີດຈາກຄວາມປະໝາດເລີນເລີ້ ແລະ ສັ່ງໃຫ້ໂຮງໝໍຈ່າຍຄ່າຊົດເຊີຍ ແລະ ຂໍໂທດຕໍ່ແມ່ຍິງຄົນດັ່ງກ່າວ.

ຂະນະທີ່ພັກກອມມູນິດຈີນໄດ້ສົ່ງຄຳເຕືອນມາຫາທ່ານ ຫລິວ ຊຸນຈື້ ຫົວໜ້າຄະນະກຳມາທິການດ້ານສາທາລະນະສຸກຂອງຊີອານ ເຖິງການປະຕິບັດງານຜິດພາດໃນການປິ່ນປົວສຸກເສີນ.

ໄລຍະຜ່ານມາ ມີລາຍງານກ່ຽວກັບສະຖານະການໃນເມືອງຊີອານຂອງຈີນ ທີ່ປະຊາຊົນ 13 ລ້ານຄົນຕ້ອງຢູ່ພາຍໃຕ້ມາດຕະການລັອກດາວມາແຕ່ວັນທີ 23 ທັນວາ ຢ່າງຕໍ່ເນື່ອງ, ສ່ວນຫລາຍເປັນການແກ້ໄຂທີ່ບໍ່ມີປະສິດທິພາບ ສົ່ງຜົນເຮັດໃຫ້ເກີດສະພາບຂາດເຂີນອາຫານ ແລະ ຢາ ລວມທັງມີບັນຫາອື່ນໆນຳອີກ.

ກ່ອນໜ້ານີ້ມີລາຍງານທີ່ຍັງບໍ່ໄດ້ຮັບການຢືນຢັນວ່າ: ມີຜູ້ຊາຍຄົນໜຶ່ງເສຍຊີວິດຈາກອາການຫົວໃຈລົ້ມເຫລວ ເນື່ອງຈາກເຂົ້າບໍ່ເຖິງການປິ່ນປົວພາຍໃຕ້ມາດຕະການລັອກດາວ.

ອ້າງອີງ:

https://www.bloomberg.com/…/china-fires-hospital-staff…

Related Articles

Leave a Reply

Your email address will not be published.

Back to top button