ຂ່າວລາຍວັນ

ກຽມປະກາດຍຸຕິ ສົ ງ ຄາ ມ ເກົາຫຼີຢ່າງເປັນທາງການ.

ໃນວັນຈັນທີ 13 ທັນວາທີ່ຜ່ານມາ ມຸນ ແຈອິນ (Moon Jae-in)

ປະທານາທິບໍດີຂອງເກົາຫຼີໃຕ້ໄດ້ໃຫ້ສຳພາດຂະນະທີ່ກຳລັງເດີນທາງໄປເມືອງ Canberra ປະເທດອອສເຕເລຍ ໂດຍໄດ້ເປີດເຜີຍວ່າ ທາງການຂອງເກົາຫຼີໃຕ້-ເກົາຫຼີເໜືອ ລວມໄປຮອດອາເມຣິກາແລະຈີນ ໄດ້ມີການ

ມະຕິເຫັນດີ ກຽມປະກາດຍຸຕິສົງຄາມເກົາຫຼີຢ່າງເປັນທາງການ.

ສົງຄາມເກົາຫຼີນີ້ແມ່ນໄດ້ເລີ່ມຕົ້ນໃນໄລຍະປີ 1950-1953 ຫຼັງຈາກນັ້ນມາກໍເຮັດໃຫ້ຈຸດຢືນຂອງເກົາຫຼີເໜືອແລະອາເມລິກາບໍ່ຄືເກົ່າ ພ້ອມຍັງເຮັດໃຫ້ທັງສອງປະເທດນີ້ກາຍເປັນປໍລະປັກກັນຕະຫຼອດໄລຍະ 70 ປີທີ່ຜ່ານມາ.

ຈຸດເລີ່ມຕົ້ນຂອງສົງຄາມເກົາຫຼີແມ່ນເກີດຂຶ້ນໃນເດືອນມິຖຸນາ 1950 ໂດຍກອງກຳລັງທະຫານຈໍານວນ 75,000 ຄົນຈາກຄອມມິວນິສເໜືອໄດ້ເຂົ້າຮຸກຮານຂ້າມເສັ້ນຂະໜານທີ 38 ເຊິ່ງເປັນເຂດແດນລະຫວ່າງເກົາຫຼີເໜືອ ແລະ ເກົາຫຼີໃຕ້.
ກອງກຳລັງທະຫານຂອງອາເມຣິກາທີ່ສະໜັບສະໜູນເກົາຫຼີໃຕ້ໄດ້ເຂົ້າຮ່ວມສົງຄາມໃນເດືອນຕໍ່ມາຫຼັງຈາກເກີດສົງຄາມ ເຊິ່ງເກົາຫຼີເໜືອທີ່ໄດ້ຮັບການສະໜັບສະໜູນຈາກຈີນ ແລະ ສະຫະພາບໂຊວຽດກໍໄດ້ຖືກຂັບໄລ່ໃຫ້ກັບຄືນປະເທດຂອງຕົນ.

ຕໍ່ມາໃນເດືອນກໍລະກົດ ປີ 1953 ທາງຕັນຂອງສົງຄາມນອງເລືອດໄດ້ເກີດຂຶ້ນ ແລະ ໄດ້ມີການລົງນາມສະຫງົບເສິກລະຫວ່າງອາເມຣິກາແລະເກົາຫຼີເໜືອ ໂດຍສົງຄາມໃນຄັ້ງນັ້ນເຮັດໃຫ້ທະຫານ ແລະ ປະຊາຊົນຈຳນວນ 5 ລ້ານກວ່າຄົນເສຍຊີວິດຈາກການຕໍ່ສູ້ກັນ.

ເຖິງວ່າສົງຄາມເກົາຫຼີໃນປີ 1953 ໄດ້ຍຸຕິລົງດ້ວຍຂໍ້ຕົກລົງສະຫງົບເສິກຊົ່ວຄາວ ແຕ່ຍັງບໍ່ເຄີຍມີສົນທິສັນຍາສັນຕິພາບແຕ່ຢ່າງໃດ. ນັ້ນໝາຍຄວາມວ່າໃນທາງວິຊາການແລ້ວ ເກົາຫຼີເໜືອແລະເກົາຫຼີໃຕ້ ຍັງເປັນປໍລະປັກກັນຢູ່ມາໂດຍຕະຫຼອດ 70 ປີ ແລະ ເກົາຫຼີເໜືອແມ່ນຢູ່ຄົນລະຝ່າຍກັບສະຫະລັດທີ່ສະໜັບສະໜູນເກົາຫຼີໃຕ້.

ມຸນ ແຈອິນ ໄດ້ກ່າວວ່າ ໃນເບື້ອງຕົ້ນເກົາຫຼືເໜືອຈະຢຸດເປັນປໍລະປັກກັບທາງສະຫະລັດກ່ອນ ເຊິ່ງນັ້ນເປັນເງື່ອນໄຂສຳຄັນ ກ່ອນທີ່ຈະເປີດທາງໄປສູ່ການເຈລະຈາຕ່າງໆ ໄດ້, ດ້ວຍເຫດນີ້ຈຶ່ງເປັນເຫດຜົນວ່າເປັນຫຍັງເຮົາຈຶ່ງບໍ່ສາມາດນັ່ງເຈລະຈາເພື່ອປະກາດຖະແຫຼງການ ຫຼື ຫາຂໍ້ຕົກລົງຮ່ວມກັນຂອງເກົາຫຼີເໜືອແລະເກົາຫຼີໃຕ້ ຍັງລວມໄປຮອດຖະແຫຼງການຮ່ວມລະຫວ່າງເກົາຫຼີເໜືອ ແລະ ສະຫະລັດໄດ້.

ນອກນີ້ ຜູ້ນຳເກົາຫຼີໃຕ້ຍັງຫວັງວ່າຄວາມສຳພັນຂອງປະເທດຕ່າງໆເຫຼົ່ານີ້ຈະເປັນໄປໃນທິດທາງທີ່ດີຂຶ້ນ. ມຸນ ແຈອິນ ເຊື່ອວ່າການຍຸຕິສະຫງົບເສິກຊົ່ວຄາວທີ່ເຕັມໄປດ້ວຍຄວາມບໍ່ແນ່ນອນຕະຫຼອດໄລຍະ 70 ປີທີ່ຜ່ານມາມີຄວາມສຳຄັນຫຼາຍ. ອີກທັງການປະກາດສົນທິສັນຍາສັນຕິພາບຍັງຊ່ວຍເປີດທາງໃຫ້ໄປສູ່ການແກ້ໄຂບັນຫາອາວຸດນິວເຄຼຍຂອງເກົາຫຼີເໜືອ ເພື່ອນຳສັນຕິມາສູ່ແຫຼມເກົາຫຼີ ແລະ ພາກພື້ນໃກ້ຄຽງອີກດ້ວຍ.

ທາງການຈີນແມ່ນເຫັນດີນຳກັບຂໍ້ສະເໜີດັ່ງກ່າວ ໃນຂະນະທີ່ເກົາໃຕ້ແລະສະຫະລັດອາເມຣິກາ ແມ່ນຢູ່ໃນລະຫວ່າງການຮ່າງສົນທິສັນຍາສັນຕິພາບໃນໄລຍະສຸດທ້າຍ. ໃນຂະນະທີ່ເກົາຫຼີເໜືອປະຕິເສດທີ່ຈະເຂົ້າຮ່ວມການເຈລະຈາໃດໆກໍຕາມ ຖ້າຫາກສະຫະລັດ ຍັງສະແດງທ່າທີເປັນປໍລະປັກກັບເກົາຫຼີເໜືອຢູ່.

ໂດຍທີ່ຜ່ານມາ ໃນສະໄໝທີ່ ໂດນັລ ທັມປ໌ ຍັງເປັນຜູ້ນຳຂອງສະຫະລັດຢູ່ ໄດ້ມີການຈັດປະຊຸມສຸດຍອດຜູ້ນຳລະຫວ່າງສະຫະລັດກັບເກົາຫຼີເໜືອ ເປັນຈຳນວນ 3 ຄັ້ງ ໃນໄລຍະປີ 2018-2019, ແຕ່ເບິ່ງຄືວ່າການປະຊຸມດັງກ່າວຈະບໍ່ປະສົບຜົນສຳເລັດເທົ່າທີ່ຄວນ ລວມໄປຮອດການປະຊຸມສຸດຍອດລະຫວ່າງເກົາຫຼີເໜືອແລະເກົາຫຼີໃຕ້ (Inter-Korean Summit) ຮອດ 3 ຄັ້ງໃນໄລຍະປີ 2018 ທີ່ຜ່ານມາ

ຂອບໃຈຂໍ້ມູນຈາກ:
– https://cutt.ly/cY0DgGu
– https://cutt.ly/sY0Dl6b
– https://cutt.ly/cY0DvjT

Related Articles

Leave a Reply

Your email address will not be published.

Back to top button